الرئيسية / الشعر الشعبي / 3 ورقات .. سلوى العيني .. مصر

3 ورقات .. سلوى العيني .. مصر

 

قلم متقطعه حروفه
علي الورقة واقف ددبان

يفور الدم ف عروقه
يقول إنطق بقي ياجبان

وهز النخوة ف اوصالك
وغير بالأصول حالك

بلاش تفرح في ترحالك
تعيش الرغبة ف التوهان

يامتعلق في قشايه
كفايا غلب ع الفاضي

حبال الود مقطوعه
ولاضمه الخرم ع الفاضي

وقالبه كفة الإحساس
وبالأوجاع تعززها

مسيرها ف مرة تتبدل
وربك يوم يعدلها

ببيع الحظ للنايمين
فى مترو العجزه والمساكين

وسارقه ضحكة مكتومه
في كم الأهه والأحزان

ياسايبه الشوق فى وش الريح
وراخيه الحبل ع الأخر

مسير القطر مرة يفوت
ووجع الغربة يتاخر

ويجى الفرح بعد الضيق
يغربل ليلك الساخر

رصيف دايب من المشاوير
ونعل الجزمة يشكى له

خطوط حمرا ف عز الليل
وذكرى تعود وتدى له

مناديل الغرام سابت
قلق مركون فى كوبايه

وزحمة ف العيون بانت
وتاه العمر جوه جوايا

وأوراق الخريف تضعف
ويظهر شعرها المجنون

تبارك خطوة التفعيل
لنغمة كل يوم بتميل

علي سطر الوجع والخوف
ضحايا الحرف صاروا ألوف

تعالي نقفل الصفحه
ويلبس القلم طربوش

خطوط العمر مش واضحه
بقيت فيها ولد حرفوش

ببيع الليله بالقرشين
وتعريفه وملمين

وتلت ورقااات علي وشين
ومين قال هااااااات

…………………………..

شاهد أيضاً

يا هايمة .. حميد النومسي .. السعودية

… ياهايمه يامروضة شرد العيف من منبع الشعر الأصيل وجزيله يابنت قومن تكرم الجار والضيف …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *