مجلة شعلة الإبداع إبداع يبني أمم
مقالات مشابهة
…
من كااااااام سنة
عايش في كوخ الأوليا
تسكر ، تعربد في القصايد و القوافي
تشتكي منّك لناسك
يشهدوا لك بالإيمان
و يأمّنوا خلف الملامح
يا إمام الحزن داوم و استمرّ
تْفرّ من كل العيون
و تقرّ ، تِملا الكاس و تشرب للثمالة
دْموع ، حروف ، ذكرى ، أمل ،
قهوة ، سجاير ، أسئلة ،
هيجل ، ديكارت ،
سقراط ، فرويد ،
شيكسبير ، دارون ،
لينين ، سيسي ،
مبارك ، مرسي ،
ناصر ، أفلاطون ،
شوقي ، چاهين ، بيرم ، فؤاد ،
نازك ، نذار ، لمبي ، فاهيتا ،
حبيشة ، أوكّا ،
عم شكشك و الريحاني تياترو مصر
المشكلة
جايز
أكيد
حل المعادلة مش هنا
طب فين هناك ؟
الليل سِكر
سهران و فارد جتته ع البرش تحت جفون عينيك
جبت الأطبة تفوّقه ما صحيش
فيه اللي قال شاعر و فيه قال لك حشيش
تسكت
تقول الخمرة مالك
و الولي يرد ب مفيش
تجذب همومك نجم برة الجاذبية
تقرّبه ليك امّا تسكر
و اللي بيدندن
يخلّي الحضرة أنس و سلطنة
كان قلبك العمّال يكسّر فيك
و في النجم اللي عاش جواك
و في الأعراف و في التقاليد
و في القوانين و حتّى ف قوس قزح
غيّرت شكل القوس و أصبح مستقيم
بيهد حاجز خوف و يدخل للقلوب
فتطمّنك نظرة رضاهم في العيون و بتنتشي
و تحرّضك تعلن بداية ثورتك
عربد و كسّر ف الأزايز يا ولا
ما تخافش سيدك دون كي شوت
بيحمي ضهرك في الخلا
استدعي كل الأمثلة تسكر معاك
و تغني و تردد وراك وِرد السكوت
و تتوه في جُب الأسئلة
بين إيه و ليه و ازاي و إمتي و فين و هل
و اوعى التجلي يوصّلك ياخدك لمين
خليك هنا
مسطول في خلوة عاوز ايه
معرفش
أنعم و أكرم باللي ما بيعرفش
الحضرة للفايقين و التوهة للدراويش
و شهادة التقدير أكبر دليل ع القفش
إجمد يا واد ما تخافش لوم
مهما امتلا الليل بالنجوم
إعشق قمر
خلّي الليالي يقولوا عنّك للسهر
خلّي السهر يفتن عليك
و البرش يرسم من همومك وشم فوق جلدك
يغطّي الخوف بكا
و يقول بمحض سكوت بصوت عالي ياهووووه
إمتى بقا ؟
عوجة لسانك توهمك لك صوت
و تشد عزمك للإيمان أكتر تقول :
إمتى بقا الملكوت يموت
و اضحك بعلو الصوت على الملكوت
و الخوف يموت .
الخوف . تموت
قبل امّا تسمع ضحكتك
واخداك من الخلوة اللي ضاق
ع القلب صبرك فيها تخرج للبراح
سواح في تيه الأربعين
بين رمشها البرد السلام
و عيون تتوّه رغم تيهك
يا جدع
…………………..
