مجلة شعلة الإبداع إبداع يبني أمم
مقالات مشابهة
علي عليوه يا للي ”
رجعت شايل
تحت باطك نص عمر
وكام حكايه للعيال
ناديت بروحك للشوارع
لم يقابلك حضنها
لقيت إزاز الفاترينات
بيبص لك
مستغرب
وع النواصي علقوا
صور
فيها اترسم واحد حليوه
بَدْلِتُه
دى ازاى صحيح اتفصلت له
ع المقاس
من أغنيات
سهرت معاك ف الزنزانات
ومن حاجات
قضيت عشانها نُص عمرك
في الخنادق
والسكك
تشيل حجاره
للهرم
و القلعه
تحفر ” كنال “
سألتهم
إيه الصور دى كلها ؟
و مين يكون
اللي اترسم بالشكل ده
ضحكوا عليك
معقول صحيح ما تعرفوش؟
ده كان معاه زُمِّيره
تشبه تمام اللي فْ إيدك
صِعِبْ عليه برج الحمام
اللي اتقلب
جَبَّانه
م ” السارى عسكر بونابرت “
و ” لورد ” جاى من ” لُنْدُره“
و بصّاصين الباش أغا العثمانلي
صعب عليه
حربي ضربها ف الميدان
ردوا عليه
مليون صبي خضر الوشوش
خدهم في حضنه و انطلق
مد الجسور
بين الجناح اللي انسرق
و طير جريح
معقول صحيح ما تعرفوش
شكلك كده
مش من هنا
حضرة جنابك جاى منين ؟
من السرايا الصفرا
يعني خلل
والا انت بهلوان
عجوز من السيرك انطرد
و جاى يلقط رزقه
هو انت مين ؟
وجاى منين ؟
بيسألوك
وكل ما تحاول ترد
تصعب عليك نفسك
تقاوح رعشتك
وتمسك الزميره
تضرب
فيطلع لك ولد
ماسك مسدس ميه
يفضل يرشرش
و العيال ماشيين وراه
يهللوا
و يغنوا
” علي عليوه .. ياللي ” ..
