الرئيسية / الشعر الشعبي / مونولوغ .. حنان شاهين .. مصر

مونولوغ .. حنان شاهين .. مصر

14355754_860034297429332_7570331344716008367_n

حساك ليه مستسلمه

ما بتنطقيش

ما بتجرحيش الصمت حتى بنهنهه

و كأن حزنك انتهى

قومي اخرجي

اتمردي قولي أنا

هى الفضيله

انك تكونى مستكينه و مهمله

و لا الرضا يعنى الخضوع

جوايا ليه موجوع

و برغم دا

ماشيه اتمتم كل ايات الرضا

و احط همي بين قوسين

و احنى رؤوس الاسئلة

و اجبر خطوطي المستقيمه ع الركوع

 

يا أيها الذات الانا

حرفك ماهوش نابض

صوتك ما هوش مسموع

فلتحذري

ممكن يكون الصمت فخ

ممكن تكون الجنه بس

للي حس

و اللى أشبع رغبته

مش للي مات م الجوع

ممكن يكون للجنه شرط

انك تعدي السور

أو تحفري في الغيب ممر

يوصلك للنور

 

يأيها الذات الانا

حاولي تعدى السور

حاولي فى مرة تطلعي

تتسمعي روحك على باب السما

تتجمعى غيمة ندي

تنزلي على أرض بور

 

يا مؤمنه

إن امتداد روحك هناك

و ان ابتدائك مش هنا

و ان الخروج م الجنه

ما كانش بغوايه

كان محض رغبه فى الخروج

كان حبل سري بين وجودك و العدم

اسمه الانا

 

ايه قوتك من غير أنا؟

تدخل تفاصيل الحكايه المبهمه

و تفسرك صرخه مخاض

مشهد خروجك من رحم

ضايق على روحك

تسميه الميلاد

مشهد صعودك كل يوم

ساعة المسا

على اعلى حته فى سطح بيتكم

تبحثي عن اجوبه

مشهد نزولك وانتى بتخبى قصيدتك

بعض المشاهد مربكه

و بعضها فيه

وقت كافي للبكا

لما ينسدل الستار

و تعودي من حيث ابتدا بيك المسار

تتحولى حبة غبار

تتحل كل الاحجيات

و تجاوبي كل الاسئله

ط س م

ك ه يا

 

يا موحدة بالله

يا مؤمنه بسر الحياة

ايه يبقى منك بعد موتك؟

الا ما خط القلم من خربشه

ممكن تسميها أنا

هى الانا بذرة تمرد ع العدم

عنصر معادل للوجود

و عشان يكون عنصر نشط

محتاج لجو من التحرر

محتاج سما

محتاج مجال شفاف

وانتى اللى ياما علموا قلبك يخاف

و انتى اللى ياما حذروك

من خطورة الانحراف

عن سطور الكراسات فى المدرسه

و انتى اللى يا ما كنت بتخبي القصايد

جوا طاقة فى جدار

كاد أن ينقض يحدث زلزله

فلتحذري كاد يوم الزلزله

أن يقترب

و هناك ها تسأل كل نفس عن أناها

من أماتها قهرا

و من أحياها

جهزت نفسك للسؤال

و لا انت غاوي تهربي م الأسئله

س : هو انت؟

ج : أنا واحده من ملايين بشر عايشه و خلاص

س: ليه ما روحتيش تطلبي منه الخلاص؟

ج : فكرت مره بس خفت

س: بتفسري بايه جملتك

قلبي اللي رافض فيا شيء اسمه الزوال؟

ج: كانت قصيده كتبتها و قطعتها

و تفسري ايه جملتك س:

ساعة تمرد و انفلات بره المدار؟

معقولة ممكن اتسأل عن اي كلمه كتبتها

غضبان إله الشعر على روحك

واجب عليك تقدمى قربان

تدبحي صمتك و خوفك م الكلام

و تكتبي فى الكون قصيده

و في الحياة و الموت

و تنفدى ان استطعت لسدرة الملكوت

لو تنفدى بسلطان

 

ما كان خلق الكون للعايشين

سدى

و لا يوم ها تبقى الجنة

للخايفين

…………………….

شاهد أيضاً

يا هايمة .. حميد النومسي .. السعودية

… ياهايمه يامروضة شرد العيف من منبع الشعر الأصيل وجزيله يابنت قومن تكرم الجار والضيف …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *