الرئيسية / الشعر الشعبي / محطات .. سمير يوسف .. مصر

محطات .. سمير يوسف .. مصر

تنويه

الولد كان غيته

يركب بساط الريح

ينشر شراع غربته

ويوجه الدفة

لبلاد بعيدة

فيها الفرح مسموح

والحزن جايز

والقلوب شايفه

 

1

لحظة سكون الروح

شق المدى عصفور

والمتعة ايه يا ولد

غير خربشات فى سطور

دنيا بترسم صور

لجنيات وبحور

من ألف ليلة

وشهرزاد تحكى

من ألف ليلة

والولد مبهور

صار الفضا ممدود

وسعت عليه الحيطان

عبرت عنيه للنور

من ألف ليله وشهرزاد

بتبات على خوفها

ﻻ الديك بيدن

وﻻ النهار منظور

وفى ليلة باعت عجزها

رفضت تأدى الدور

وقف الولد ينده

على مسرور

 

2

طنطا

فى طنطا شيخ العرب

حمص وحب العزيز

وكتاب بقرش

وسبحة للذاكرين

والحضرة حاضرة

والحضور تايهين

والمنشد اللى انجذب

شق القلوب نصين

الصبر بعد البلا ؟

وﻻ البلا بعده؟

الوجد بعد الفراق ؟

وﻻ الفراق بعده ؟

طرح السؤال وانزوى

لما الهيام شده

شق الصفوف درويش

مسكين على قده

قال العطش منجاة

والعطشانين عدوا

واللى اغترف وارتوى

رجع فى تيه لسنين

أهل المحبة فى ضنا

أرواح وسكنت طين

الوجد باب الهلاك

والنجاة الاتنين

 

3

القطر

القطر دنيا صغيرة

جلاليب وافندية

وبياعين نعناع

يرد الروح

وعسلية

وبنت حبست

سرها بكتاب

مدت خيوط حسنها

للمستكين بعذاب

حلمه على قدها

لكن النصيب غلاب

القطر وشه حديد

صدم الجميع بغياب

رجع الولد مهزوم

لما السؤال عانده

شق الجموع درويش

عاد السؤال تاني

للى ركب بعده

طرح السؤال وانزوى

خبى الجواب عنده

الصبر بعد البلا ؟

وﻻ البلا بعده؟

الوجد بعد الفراق ؟

وﻻ الفراق بعده ؟

………………..

شاهد أيضاً

يا هايمة .. حميد النومسي .. السعودية

… ياهايمه يامروضة شرد العيف من منبع الشعر الأصيل وجزيله يابنت قومن تكرم الجار والضيف …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *