الرئيسية / الشعر الشعبي / عمار يا مكـة عمار .. طارق أبو النجا .. مصر

عمار يا مكـة عمار .. طارق أبو النجا .. مصر

12279246_10201007366264029_1345764380103009447_n
***
عمار يا مكة عمار
عمار يا أرض النبي
ياما قلبي لف و دار
وارتاح في حضن النبي
عمار يا مكة عمار
***
ياه …..
ده انا كنت رايح و شايل هم
خمسين سنه ماشي ف صحارى الغم
ماشي … واشيل ذنوب
واقول : بكره ح اتوب
لا بتوب … ولا مغصوب
ولا عندي ريحة الدم
واقول : يانفس اهربي
وانجي من الأشرار
عمار يا أرض النبي
عمار يامكة عمار
***
أنا رحت يوم ما وصلت ؛ على بيتُه
أصل النبي فاتح لكل الخلايق بيتُــه
ووشوشتُه ؛ أنا جيت لك !
عارفني ؟
أنا اللي ياما من غُلبي ناديتلك
خلاص جيت لك
دعاني الشوق و لبيتُه
يانفس جنب ” الروضه ” قرَّبي
واطفي بدمعك ، حُرقتي و النار
عمار ياأرض النبي
عمار يا مكة عمار
***
( حمــــــــزه ) ياعم النبي .. ياسيد الشهداء
حرْبه رماها الغبي … أدمت عيونه بكـــاء
معلش يا ( طــــــــــه )
خدْها اللي أعطاها
م انا مات لي ف يوم ” رفيق ”
بنعيِّه ؛ بس بخفاء
فارقني وكان صبي
حسبتُه من الأبرار
عمار يا أرض النبي
عمار يامكة عمار
***
الله عليك يا ( أُحُد ) .. حاضن ربوع سيدنا
يا جدنا اللي شهد .. ع الوقعه و ” وليد” نا
( بنحبك ).. رسولنا قال
ونحب مكان ما آل
الركْب ويَّا الناقه بحبيبنا
صلِّي يا روحي و اركبي
في هودج ” المختار ”
عمار يا أرض النبي
عمار يا مكة عمار
***
وخدّْني معاه على ” مكَّه ” .. ع ” البيت ” اللي كله نور
الله … دى ( الكعبه ) ولا َّ سِكَّه ؛ وآخرها بيت معمور؟
شوف الحمام بيطوف
وتحتُه ماشيه ألوف
رافعين قلوب و كفوف
وملايكه بينهم شبْكه !
يا إدين (مُحمد ) طبطبي
ده انا ببكي ليل ونهار
عمار يا أرض النبي
عمار يا مكة عمار
***
يا ستنا ” هاجر ” .. أنا بسعى كما سعيتي
وعرفت في الآخر .. ليه تعبتي وشقيتي
عشان تسقي الحبايب كاس
ويهدوها لاعزّْ الناس
ويحكوا طفلك اللي داس
برجلُه لمَّا دعيتي
يا روحي عبِّي ، واشربي
وادعي لصاحب الدار
عمار يا أرض النبي
عمار يا مكة عمار
***
ع ” السطح ” فوق ع ” الحرم ” .. كانت هناك قعدتي
أُقسم برب الكرم ….. شميت عبير جنتي !
وابُص فوق ع النور
سابح ملايكه و حور
أدعي لرب غفور
يحسن ختام دُنيتي
أهو ده صحيح مكسبي
و” الهادي ” يبقى الجار
عمار يا أرض النبي
عمار يا مكة عمار

…………………..

شاهد أيضاً

يا هايمة .. حميد النومسي .. السعودية

… ياهايمه يامروضة شرد العيف من منبع الشعر الأصيل وجزيله يابنت قومن تكرم الجار والضيف …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *