الرئيسية / الشعر الشعبي / شاعر بيشكى دخول جتته ف الظروف.. سمير الأمير .. مصر

شاعر بيشكى دخول جتته ف الظروف.. سمير الأمير .. مصر

13346413_10154152490924788_5509356904486271139_n

بتشكى دخول جتتك ف الظروف

وتشكى خروج الظروف من عنيك

وتشكى الضمير اللى

اللى خانق صعودك على جناح غيابى

مخافة غيابك مخافة تروح الجراية عليك

ما تفهم_ أصول الحكاية _ جنابك حضورك غياب

إذا الكدب عابك وخلاك مجرد خيال فى المراية

و إذا الشعر غاية وسباق

أو الدنيا هامش نفاق لمتن القرف و الغواية

فقول ع الرجولة السلام

وصلب ف عودك بسخف الكلام

مدام القصايد مجرد كلام فى النهاية!!

مجرد إطار لانتصار الخيابه/

طريق لاختصار الشرف ف الكتابة

وانهزام الشرف فى الحياه

إذا الشُعرا تحت الموائد قطط

وفوق الموائد غيلان

زحام فوق وتحت وحواليك زحام

فدوس فوق رقابهم وربك يعينك

وساعة ما تحكم حتحلف بدينك …

بأن الظروف بنت كلب الظروف

وتشكى دخول جتتك فى الظروف

وتشكى خروج الظروف من …. ( بلاش)….

وتجرى لبعيد.. كما قبل منك بتاع الصعيد

ما قال قبل منك كلام ف الرفاق

ولما استهان الغباء بالرفاق

وفرق عليهم حصص الاتفاق ..

لقينا الكلام فى الفنادق رياله ورياء

فزاد القرف و الشقاق ..

وأنا مش بدينه وأنا مش بدينك

لكنى غصب عنى راح اكفر بدينه ودينك

يا دين أم دينك-

ما هوش دين محمد ولا دين يسوع

ده دين الانبطاح الغبى والخضوع

ودين الشبع بعد ذلة وجوع

فلا الشعر سكة مناصب

ولا الشعر غاصب

ولا الشعر غير اشتعال الحقيقة بنار الحروف

إلى أن يعرى الزمان الظروف

إلى أن أبان .. إلى أن تبان

إلى أن يبان الشجاع م الجبان .

…………..

شاهد أيضاً

يا هايمة .. حميد النومسي .. السعودية

… ياهايمه يامروضة شرد العيف من منبع الشعر الأصيل وجزيله يابنت قومن تكرم الجار والضيف …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *