مجلة شعلة الإبداع إبداع يبني أمم
مقالات مشابهة
…
سارح فى ملكوت الشتا
غمضت عينى
والمطر فوقى إتفرط
دنيا الخيال فتحالى باب
خادنى لـ ترحال النقط
شوفت المطر
حواديت بتخلق فى البشر
حواديت حكايات بتروينا عِبَر
–
نقطة مطر
طلت عـ الدنيا ف طرف الليل
لمحت سهران من صوت ضيِقُه
سمعت همسات لأمانى حاجات
مخفية عن حظ طريقه
و السهرة بتفتح للوحدة
مجالات اليأس
و اليأس بيخلق لمجاله مليون تفكير
النقطة مالت ع الساهر
مع صوت الفجر
غسلت تفكيره
بتنبيه لبشاير خير
–
نقطة مطر
طلت ع الدنيا فى ساعة ظهر
لمحت عطشان
جوفه الحران م الشقا
شبه إتحرق
حتى إحساس العطش
فى زحمة العيشة إتسرق
النقطة كانت فى الأساس
متبخرة من جلده
فى الصيف اللي فات
نزلت فى سباق المسافات
و إترمت على حضن جوفه
لحظة شرّق
أتاريها بنته من العرق
–
نقطة مطر
أخدت طريق على حب خايف
بصت ف عين المغرمين
شافت لهيب بركانه زايف
و عشان تغيته ف لوعته
عملت عزول بين الشفايف
–
نقطة مطر
و إتسرسبت من سرب نازل م السما
هاجم ع البحر بجبروته
الكترة فيه تغلب غريق
بيعافر مع طبة موته
ومصيره يغرق بالمطر
و موجة الموت اللئيمة
النقطة سابت سكته
حدفت لأبعد شط
مايكونش مسرح للجريمة
–
نقطة مطر
شافت دموع على عين سجينة
تملى تضحك للبشر
بإبتسامة مش متينة
دق المطر قضبان جفون الطيبين
كسر ببان على كل جرح
متربسين ومعلقين ضحكهم
على حزنهم زينة
وأنا اللى سارح فى المطر
شوفت فـ حواديته و حكاياته
معنى النجاه إزاى بينزل مـ السما
مغصوب على الموت بالقدر
يفدى الحياه
فتحت عينى لاقيتنى مرغوم بالحياه
لكنى مفتون بالشتا
و من موته طمعت أموت
بس أما أموت
يكونلى دور بين البشر
يشبه لدور
نقطة مطر
…………..
