الرئيسية / الشعر الشعبي / بنت بتشبه الايام .. منى حواس .. مصر

بنت بتشبه الايام .. منى حواس .. مصر

انا البنت اللّي لمّا تنام على كتفك
تكون عاقلة …..
وهادية هدوء مافيش زيّه
على الأرض اللي مش سامعة
يادوب…….
غير همس أشواقنا
…………
وأنا البنت اللّي مجنونة
بكل العشق ف سنينك
تنور لك قناديلك
ويا ويلك….
إذا حسّيت
بإنْ عيونك السرحانة
بتفكّر تشوف غيري
فاقول لعينيك وحشتينى
وماتردّش…
كأنك يعنى مش سامع
فتسمع منّي بعديها
كلام واجع
وكام حلفان
بأغلظ أيمانات الله
لا أنا مخاصماك
اقل مافيها كام أسبوع
وروح خلّى اللي كات شاغلاك
تدفّي روحك البردانة من بعدى !!!
……………
وأنا البنت العبيطة بجد
عشان روحي بتصفى لك
في أول نظرة من عينك
وحتى قبل ماتقدّم لها الأعذار
تكون سارحة ف تنهيدك
وزارعة وردتى ف إيدك
فترمى وردتك ع الخد
وتهمس في شرايينى :
” وحشتينى “
فاغمّض عينى واحلف لك
بإنى عمرى مافكّرت
اعاقبك وابتدى بالبُعد…!!!
………….
أنا البنت اللي بتحبّك
وعِرفْت….
إنّ الوقت ف بعادك
طويل جداً ومش بيفوت
وإن الدنيا في غيابك
كئيبة وصعبة المنظر
و صورة مُصغّرة
م الموت

…… …..

شاهد أيضاً

مصر العروبة .. حمد المر المهيري .. الإمارات

… 6أكتوبر . . مصر العروبه حلفنا وطوق النجاة تقديرها محفوظِ في دار الظّبي في 6 …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *