الرئيسية / الشعر الشعبي / الزبالة .. قصيدة عامية لأمير شعراء الفصحى .. علاء جانب .. مصر

الزبالة .. قصيدة عامية لأمير شعراء الفصحى .. علاء جانب .. مصر

13177220_1300917596602607_5791033318346216429_n

 

الزبالة
حاجة أكبر من خيالي
والنضافة
فعل فاضح
في بلاد العنكبوت اللي ف سؤالي

الزبالة في الشوارع
حاجة يمكن
تبقى ممكن
بس لما تبقى في التفكير
ف ده
فوق احتمالي

الزبالة اللي ف عقولنا
والزبالة في الضماير
والزبالة في سلوك جيلكم وجيلنا
والزبالة في النوادي وفي العماير
خلّت الأحلام في عيني
شيء شبيه جدا
بأفلام الخرافة

أجمل الناس في البلد دي
هما عمال النظافة
وبصراحة هما أجدع من سياسي
أو
منافس عينه طالعه ع الكراسي
أو جماعة مصدعانا من زمان
ومعيشانا في فيلم ” أوهام الخلافة

أو وزير مرضيش يكلم
ناس غلابة
بنتهم في الثانوية
طالعة أول جمهورية

أو رجال الاقتصاد اللي بياخدوا دم قلب الشعب صفقة
والدولار عمال بيغلى

والحياة عمالة تولع واللي كسبان بس فيها
هما تجار الصرافة

الزبالة
في كتبنا .. و ف أدبنا
واللي بيسموه مجازا
في الخيال ” تجديد خطابنا
الزبالة منهجيا
ساكنة في التعليم
وفي الاعلام
وفي الاوقاف
وفي وزارة الثقافة

احنا فيران التجارب
كل مليادير وهارب
ييجي يعمل فينا مشرع عبقرية
يعمل القرشين ويخلع
واحنا نقعد
مرة بالكبد اللي مهري
ومرة بالسرطان يا قهري
ومرة بطني ومرة ضهري
والحكومة رافعة ايدها وكل حاجة في اللطافة ….

فيها ايه لو بس ننضف
نعتذر لو يوم غلطنا
نلبس الحشمة ف هدومنا
نحترم تاريخ بلدنا
والتحرش والمعاكسة
والعيال اللي مشاكسة
والحريم اللي ما راكسة
والتكاتك
والثقافة التوك توكية
نحترم تاريخ بلاد الأبجدية
هو شهر من التزامنا
واحتقارنا للسخافة والهيافة والخفافة
كلها رح تبقى جثة في القرافة

وبصراحة
اجمل الناس في البلد دي
هما عمال النظافة

……

شاهد أيضاً

يا هايمة .. حميد النومسي .. السعودية

… ياهايمه يامروضة شرد العيف من منبع الشعر الأصيل وجزيله يابنت قومن تكرم الجار والضيف …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *