الرئيسية / الشعر الشعبي / أرجوك يا قبر أمى .. فتحي نجم .. مصر

أرجوك يا قبر أمى .. فتحي نجم .. مصر

14670646_1278213935536168_208477363255526598_n

أرجوك يا قبر أمى خليك رحيم بيها

شممها ريحة المسك وأحلو فى عنيها

وبأمر الله تعالى حوطها بالحسنات

دفيها نور وحنان من رهبة الظلمات

لا إله إلا الله الموت علينا حق

اشملها يا الله انت رحيم وأرق

زين حيطان قبرها للجنة رقيها

أرجوك يا قبر أمى خليك رحيم بيها

 

أمى اللى كانت بتدى من غير ما تستنى المقابل

أمى اللى فرشت دفاها وف قلبى طرحت سنابل

أمى دى كانت عظيمة شمعة فى قلبى تقيد

تحضنى كنت انسى التعب وتهون الصعب الشديد

أمى طفولتى وصبايا أمى نضوجى ونجاحى

كانت بروحها معايا وسبتلى بصمة ف كفاحى

كانت سبب ف وجودى حطانى ف عنيها

أرجوك يا قبر أمى خليك رحيم بيها

 

جايز خدتنى الحياة وكنت بتأخر يا أمى

كنت المقصر فى حقك وإنتى تسامحى تضمى

حسيت بقيمتك قوى بعد الفراق والموت

سامحينى ياما قوى رانن فى ودنى الصوت

وإنتى تنادى عليا ما تفوتش امك كتير

فأجرى عليكى واضمك

وأوطى ابوسك وأقولك

اشوف وشك بخير .. أشوف وشك بخير

كل الشموع تمثيل ..أمى اللى كانت حقيقة

أمى ملهاش مثيل أمى البراءة البريئة

ياّما الفراق لونه آسى طعم الحياه صار مرارة

ياّما دموعى فى ضلوعى والقلب فيه إنكسارة

لولا الايمان بالله أن القدر مكتوب

وإن الحياة واصله لموت وف عمرنا محسوب

كنت افتديها بروحى وم الموت اخبيها

أرجوك يا قبر أمى خليك رحيم بيها

………………..

شاهد أيضاً

يا هايمة .. حميد النومسي .. السعودية

… ياهايمه يامروضة شرد العيف من منبع الشعر الأصيل وجزيله يابنت قومن تكرم الجار والضيف …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *